上帝的男高音

剛剛睇完一套非常激勵人心嘅真人真事電影，叫「上帝的男高音」。

電影內容係講發跡於義大利嘅韓籍男高音歌唱家裴宰徹，喺歐洲嘅歌唱事業如日中天，喺經理人澤田引領之下，遠赴日本演出威爾第歌劇【遊唱詩人】，再造成空前轟動。但當裴宰徹正處於事業顛峰之際，就發現患咗甲狀腺癌，仲必須要切除部份聲帶，醫生話佢知，佢嘅歌唱生涯都會跟住結束……我諗呢個打擊對任何人嚟講都係恐怖嘅，而主角當時仲係個咁成功嘅歌唱家，想像唔到突然間無哂一切嗰種驚慌同彷徨。

當佢陷入喺殘酷嘅現實世界同夢想之間，極度痛苦嘅時候，經理人兼好朋友澤田無放棄希望，千辛萬苦去揾聲帶手術權威去幫佢執刀，希望奇蹟會出現……男主角憑藉著信仰、妻子同澤田嘅支持，就以無比堅強嘅毅力去面對呢場人生挑戰……每次一聽到佢唱詩歌，我ｄ眼淚就控制唔到，見到佢由高峯跌落谷底，再好用力咁爬番起身，真係好激動。

套戲嘅人物感情拍得好細膩，故事內容交代得好清脆、唔說教，啲鏡頭攞位又靚，睇得到製作團隊嘅誠意，比起一般商業電影，可以話係一股清泉，絕對係一套值得睇嘅好戲！!





《上帝的男高音》慈善優先場觀後感 - Sydney Ng (Pretty Beauty Spa創辦人)