2015年10月28日 星期三

P.B.Group紅磡分店派米活動【愛的種子❤美從心出發】2015-10-27

的種子美從心出發

今日是主賜的好日子!
大概係一個月前,心入面突然有股衝動,好想透過P.B. Group大家庭做一啲溫暖又可以發放正能量嘅事情~於是乎,我就諗
(同事A:Sydney你又諗頭?!想點先?)
欸,喂!不如派米吖!(同事B:下?美容院派米?個感覺有啲唔夾,就好似以為飲嘅係咖啡,點知一啖飲落去發現係可樂
其實美容院派米唔係無得諗吖!我地有間分店喺紅磡!紅磡好多公公婆婆,街坊街里應該守望相助!
(同事C:公公婆婆唔會幫襯你買facial架喎
呢個唔係宣傳活動~我希望除咗可以派米幫到有需要嘅人,仲可以將天父爸爸嘅愛傳開去,公公婆婆腳痛手痛,我地有按摩治療師正正可以幫到佢地,同時以傳埋福音,一於搞啦!
就喺我一聲令下,P.B. Group大家庭就眾志成城搞派米,又要預備海報傳單,又要聯絡福米供應商,又要同周邊街坊溝通,鋪頭員工又要落手落腳做義工!係度想講聲多謝!多謝大家陪我一齊興奮,一齊熱血!先令第一波派米行動可以順利進行!
當日我見到有好多天使,天使唔係有著翅膀,唔係識發光,而係切切實實,心裡帶著愛咁去幫助人!愛你們每一位!
派米日期:2015年10月27日起,逢週二下午
派米地點:九龍紅磡 湖光街1-7號聯盛大廈地下
聯絡電話:39569845
留張倩影~

有位婆婆腳痛,我地嘅按摩師即刻幫忙舒緩~

公公婆婆飲羅漢果水同菊花茶,秋冬前夕滋潤下!


婆婆們齊按摩~好溫暖!



2015年10月9日 星期五

有Sydney,無斑斑!(二:追加文)做足防曬~~敏感肌~暗瘡肌也不怕!

【追加文】做足防曬~~敏感肌~暗瘡肌也不怕!


上一篇講防曬比拼文一出,反應熱烈~~有位女同事睇完問我,Sydney你提嘅幾款防曬,係咪生暗瘡都搽得架??
睇過,你邊有暗瘡呀??係Pretty Medical做得嘅同事,講真,皮膚全部都好好!
哈哈,近水樓台先得月~~~佢地要做幾多facial我都好鼓勵架~~~睇住大家變靚我就好開心~~
生招牌!
點知同事好緊張指住自己“丁”咁大粒嘅黑頭仔話係暗瘡,激死!
我睇真啲,黑頭事小,不過比較多微絲血管,屬於敏感肌膚就真~~
始終防曬日日搽,含有酒精性份嘅日本防曬一定唔啱佢。最好就用全天然,礦物質,但之前介紹過Bareminerals,雖然係礦物質,但係粉狀,董醫生話做唔到100%覆蓋架。
所以如果要全天然,礦物質,又要液狀,
我推薦以下呢款,DERMIS UNIQUE 。佢唔含酒精。有綠茶成份(抗氧化),庫拉索蘆薈葉萃取(保濕),葵花籽油(含豐富之維他命E 及亞麻油酸,本身抗氧化性佳),但不得不提,呢款防曬含有Retinyl Palmitate,即係棕櫚酸維他命A,雖然有抗痘功效,但董醫生叫我提提大家,懷孕同準懷孕期間就盡量唔好用喇~
噢,呢位同事無BB亦唔打算生BB住,即刻借佢手仔唻試用下~~



質感:★★★★☆
同事:膏狀感覺,質地係杰身,但容易推開,唔錯。

美白效果★★★★☆
氣味:★★★★★(無味)
同事:隻色紅紅地,涂上面應該可以令氣色好啲。
結論就係呢款防曬好處係天然,含有抗氧化成份較多,唔好處係稍嫌SPF30度唔係好夠,平日翻工OK,但出海玩就唔夠用~~而且for翻真係暗瘡人士(我講真正暗瘡,唔係一粒黑頭XD)我素顏媽媽搵多咗另一款防曬唻介紹俾大家,多個選擇!

登登登凳~~~就係Elta MD嘅防曬喇!有分SPF41同46,哈哈個數字好騎呢,但ANYWAY都係用翻我教大家嘅方法,SPF41x15分鐘咁唻計翻幾耐需要補搽!
以下試上手嘅係UV Clear Broad Specturm SPF46,專門為暗瘡肌膚而設!!內含Nicotinamide,維生素B3 之衍生物。可以維持肌膚含水量,增進真皮層微循環。

研究亦都顯示對於部分皮膚發炎狀況有抗炎之幫助,阻止發炎性痘痘(inflammatory acne)惡化!
哼去死啦痘痘~~加上佢有Sodium Hyaluronate,即係玻尿酸(我為咗查呢啲特有名詞,狂煩董醫生哈哈)號稱最強保濕劑!


質感:★★★★★
同事:感覺容易推開~會薄身過之前個款~

美白效果:★★★★★
                                                氣味:★★★★☆(少少防曬用品個種特有味~~)
同事:個味好海灘呀~~hahaha~即係去海灘會搽太陽油個陣味!不過搽完睇落好白凈...
結論就係如果論SPF防曬指數,呢個牌子會優勝點,但講天然成份,上面個款較為優勝。至於SPF41個款係專門比大家落水,去海灘用嘅!擁有40分鐘防水功效!而且敏感肌膚都可以用呢!




以上兩款就係出面比較少見,我個人私心認為比敏感肌同暗瘡肌妹子嘅特好用防曬用品~~
今次同大家講清楚有咩成份,因為我見好多妹子買護膚品也好,防曬也好,通常唔會留意得咁清楚,但了解自己搽緊咩,係好重要,皮膚係我地身體嘅第一度防線,要好好保護嘛!

2015年10月8日 星期四

有Sydney,無斑斑!(二)做足防曬~~擊退色斑

SPF度數嘅真正意思??唔關防曬強度事??

話說呢幾日都天陰陰,無太陽出~~好嘢!唔洗曬~~

但風雨不改,最貪靚的我,避免斑斑打走咗又跑出來~都照舊每日塗上SPF50度防曬~
因為我地嘅駐診皮膚醫生董醫生話,無論係室內燈光定電腦屏幕,都有紫外線架!
我希望啲防曬可以好似Iron Man嘅面具一樣咁堅固,保護我嘅幼嫩肌膚!(唔好打我,要打都唔好打面)










點知轉個頭皮膚醫生又話我知,阿Sydney,其實SPF(Sun Protection Factor)度數高低其實並唔代表擋到紫外線強度嘅能力~度數越高,只係代表,work嘅時候越長!
我聽完之後嘅反應係...
唔通咁多年涂50度防曬都係白搽?早知買低度數啲防曬,反而無咁Block毛孔啦!






董醫生好冷靜咁答我...唔係...一般人唔係懶就忙(聽落幾有道理),唔會補防曬,所以防曬度數越高,咁你受紫外線照射嘅時間咪越少囉!
好學嘅素顏媽媽,即係我,舉手問,欸..咁搽SPF50度防曬,可以頂到幾耐呀??
董醫生又好有型咁回我~~
雖然暫時未有國際公認嘅計算標準知道唔同度數嘅防曬可以Keep到幾耐,但都有數得計。一般呢,亞洲人暴曬,約15分鐘就會曬傷~
條公式係咁計:
SPF 50 X 15(mins) =  750mins 
750分鐘即係大概有12個小時。
換言之。早上9點塗SPF50度防曬,直到晚上9點都有效嘅。


咁我地係防曬產品包裝上見到嘅PA+同++同+++又係咩唻架?

SPF同PA都係巧立名目?!



其實PA+同SPF一樣,都係指出防曬嘅時間。
唉,同樣係指防曬時間,又要分SPF又要分PA!
無辦法啦,商業世界,包裝好重要,多樣標籤,就可以標榜多一樣嘢,唔同嘅SPF組合唔同PA值,大家就會買多幾款唔同嘅唻試!
你問我邊隻防曬用品好用?幾時選擇咩度數?
我會覺得只要做到完全每吋肌膚防曬,唔癡立,唔搞到生粒粒,同SPF,PA度數夠高,就Perfect。
睇真啲,第一點係每吋肌膚,所以粉狀防曬基本可以OUT,又唔防水防油,香港天氣唔係熱到出汗,就落雨(同董醫生講,人唔係懶就忙一樣哈哈)
試問粉狀防曬點完全care,頂多用來補下~
試用過Bareminerala身體粉狀防曬,身同面都搽得。我認為佢比我用過清爽嘅液狀防曬還要癡立,而且只係得SPF30度。搽完皮膚顏色又無改善...
另一款係喺泰國買翻唻Ponds
支防曬粉無詳細講防曬度有幾多SPF,不過就有註明係"Double UV Protection".
不過咁,無列明清楚,我覺得作為防曬產品係令人唔夠安心。主要嘅功效係"控油,定妝,防曬",有朋友話係泰國買左開唻用,無曬黑到...但抵讚嘅係,起碼佢真正做到控油先~同對膚色提升都有幫助,好過Baremineral架喇。



液態狀嘅如果要唔太癡立,通常係日本牌子。
但不得不注意嘅係,大部分日本牌子嘅防曬,都內含酒精。對出油多嘅妹子還可以,但對一些皮膚本身乾(我都係,一般會生雀斑嘅人士都係)及一啲對酒精過敏嘅妹子,就可能唔太適合。
Biore呢款,有痘痘肌嘅朋友同我講好適合自己用,唔會出粒粒,膚色紅潤得來有光澤,雖然遮瑕度一般。但防曬指數確係高,價錢又便宜。


最後唻到我目前遇到最好用嘅防曬~La Roche-Posay,雖然佢叫Gel,但其實都係cream狀。點解話佢好用呢?SPF50搭PA++++證明防曬嘅時效夠曬長,啱我呢啲唔係懶緊就忙緊,唔會補防曬嘅人!加上佢有控油粒子, 防曬度高都Keep住清爽!防水度又高,唯一小小缺點係遮瑕度唔高,對一啲皮膚本身OK嘅妹子可以,但如果有嘢要遮下,可以用呢個牌子另一款潤色系列。以下:


會無咁控油,但遮瑕效果好啲!
呢兩款我親身試過,行山都曬唔黑!